पती-पत्नीच्या नात्यातील गोडव्यात स्मार्टफोनमुळे कडवटपणा...

                  स्मार्टफोनवर वेळ घालविण्याची सवय आता पती-पत्नीच्या नात्यात मोठे विघ्न घेऊन येत असल्याचे धक्कादायक वास्तव पुढे आले आहे.

                पती-पत्नीच्या विश्वासाच्या नात्यात मोबाइलमुळे संशयाचे विष पेरले जात आहे. परिणामी कौटुंबिक वाद व अन्य व्यसनांसोबतच मोबाइलचे व्यसनही घटस्फोटाचे कारण ठरण्याची भीती व्यक्त होत आहे. तासन‍्‍तास मोबाइलवर बोलतो, माझ्याकडे लक्ष देत नाही... नक्कीच माझ्या पत्नीचे/पतीचे इतर कुणाशी अनैतिक संबंध असतील असा संशय असलेल्या अनेक तक्रारी केंद्रीय समाजकल्याण सल्लागार मंडळाच्यावतीने चालविण्यात येणाऱ्या आपतग्रस्त कौटुंबिक सल्ला व मार्गदर्शन केंद्राकडे आल्या आहेत. १९९५ पासून सुमारे साडेतीन हजार कौटुंबिक वादाच्या तक्रारी दाखल झाल्या आहेत. त्यात काळानुसार कौटुंबिक वादाच्या कारणांतही आता बदल होत चालला आहे. जानेवारी २०१४ ते सप्टेंबर २०१४ या ९ महिन्यात आपतग्रस्त कौटुंबिक सल्ला व मार्गदर्शन केंद्राकडे मोबाइलमुळे निर्माण झालेल्या संशयावरून वादाच्या २२ तक्रारी प्राप्त झाल्या आहेत.

९७ दांम्पत्य पुन्हा एकत्र

सासरच्या लोकांकडून हस्तक्षेप, पतीचे दारू पिणे, पती किंवा पत्नीचे अनैतिक संबंध असणे, आर्थिक ताणतणाव, हुंड्याची मागणी अशा विविध कारणांमुळे वाद निर्माण झालेल्या एकूण २२९ तक्रारी आपतग्रस्त कौटुंबिक सल्ला व मार्गदर्शन केंद्राकडे यावर्षी आतापर्यंत दाखल झाल्या. यातील ९७ दांम्पत्यांना पुन्हा एकत्र आणण्यात कौटुंबिक सल्ला व मार्गदर्शन केंद्राला यश आले. ३३ प्रकरणांमध्ये कलम ४९८ अंतर्गत गुन्हा दाखल करण्यासाठी पोलिस ठाण्याकडे ही प्रकरणे पाठविण्यात आली आहेत. या केंद्राकडे तक्रारी घेऊन येणाऱ्यांमध्ये ९५ टक्के महिला आणि ५ टक्के पुरुष आहेत. पोलिस ठाण्यांकडून ही प्रकरणे या केंद्राकडे येतात.

अशी आहेत प्रकरणे वादाचे कारण संख्या - पतीचे दारू पिणे ४७ - सासर ३४ - संशय २२ - अनैतिक संबंध २२ - आर्थिक ताणतणाव १२ - हुंड्याची मागणी २२ - इतर ७०