पत्रकारावरील हल्ल्याचा पंढरीत कांॅग्रेसच्या वतीने निषेध

Pandharpur Live News December 11, 2018

पंढरपूर LIVE 11 डिसेंबर 2018

पंढरपूर । प्रतिनिधी,
गेल्या अनेक वर्षांपासून लोकशाहीचा चौथा स्तंभ असलेल्या मिडीयाला काही शक्तींपासून जाणीवपूर्वक कमकुवत करण्याचा प्रयत्न केला जात आहे. परिणामी अवैध धंदेवाले, गावगुंड यांनी त्याचा गैरफायदा घेत पत्रकारांवर प्रत्यक्ष हल्ला करण्यापर्यंत अशा लोकशाहीविरोधी लोकांची मजल पोहोचली आहे. सोलापूर जिल्ह्यात असाच प्रकार यापूर्वी ही घडला असून आता सोलापूर लाईव्हचे संपादक विजयकुमार बाबर व त्यांचे सहकारी जावेद खान यांच्यावर सशस्त्र हल्ला करून त्यांना जीवे मारण्याचा प्रयत्न केला आहे. या घटनेमुळे पत्रकारांमध्ये दहशतीचे वातावरण निर्माण करीत अशा वृत्ती पत्रकारांना घाबरवू पाहत आहेत. तेव्हा लोकशाहीचा हा चौथा स्तंभ जीवंत ठेवण्यासाठी पत्रकारांना शासनातर्फे योग्य ते संरक्षण ताबडतोब द्यावे व संबंधित आरोपींवर कडक कारवाई करावी अशी मागणी करत घडलेल्या प्रकाराचा महाराष्ट्र प्रदेश कॉंग्रेस ओबीसी विभागाच्यावतीने जाहीर निषेध करीत आहोत, अशा अशयाचे निवेदन पंढरपूर प्रांताधिकारी कार्यालयाला महाराष्ट्र प्रदेश कॉंग्रेस ओबीसी विभाग सचिव प्रा.अशोक डोळ यांनी दिले आहे.
यावेळी कॉंग्रेस शहराध्यक्ष ऍड.राजेश भादुले, सोलापूर जिल्हा कॉंग्रेस ओबीसी अध्यक्ष समीर कोळी, मधुकर फलटणकर, दिपक येळे, बाळासाहेब आसबे, समाधान रोकडे, सुभाष गायकवाड आदि कॉंग्रेसचे कार्यकर्ते उपस्थित होते.