कर्मवीर भाऊराव पाटील महाविद्यालय सर्वच बाबतीत उत्कृष्ट - प्रा. डॉ. हिरामण तिवारी

Pandharpur Live News December 12, 2018

पंढरपूर LIVE 12 डिसेंबर 2018

पंढरपूर: ‘कर्मवीर भाऊराव पाटील महाविद्यालय कॉलेज वीथ पोटेन्शियल फॉर एक्सलन्स (यू. जी. सी. - सी. पी. ई.) तर आहेच, त्याच्याही पलीकडे जाऊन पाहिले तर हे महाविद्यालय सर्वच बाबतीत उत्कृष्ट आहे’ असे मत जवाहरलाल नेहरू विद्यापीठ नवी दिल्ली मधील इतिहास अभ्यास केद्राचे अध्यक्ष प्रा. डॉ. हिरामण तिवारी यांनी व्यक्त केले. त्यांच्या समवेत आलेल्या श्री. दुर्गा मल्लेश्वरा महिला महाविद्यालय, विजयवाडाच्या प्राचार्य डॉ. सौ. टी. विजया लक्ष्मी म्हणल्या की, ‘अध्ययन, अध्यापन, संशोधन, गुणवत्ता, भौतिक सुविधा आणि अभ्यासक्रमा शिवाय कॉलेज वीथ पोटेन्शियल फॉर एक्सलन्स अंतर्गत घेतले जाणारे विविध कोर्स आणि उपक्रम या बाबतीत या महाविद्यालयाचे काम उत्कृष्ठ आहे. महाविद्यालयाचे प्राचार्य डॉ. अशोक भोईटे यांचे नेतृत्व आणि सेवकांचे योगदान यामुळे येणार्‍या काळात महाविद्यालय अजून प्रगती करेल.’ या समितीने महाविद्यालयातील सर्व विभागांना भेट देऊन पाहणी केली. यू. जी. सी.- सी. पी. ई.अंतर्गत मिळालेल्या अनुदानातून अद्ययावत झालेल्या प्रयोगशाळांमुळे महाविद्यालयाचे विद्यार्थी आणि संशोधक यांना आवश्यक आधुनिक उपकरणे उपलब्ध झाली आहेत. त्यामुळे महाविद्यालयाच्या गुणवत्तेत आणि संशोधनामध्ये वाढ होणार आहे.