सोलापूर:- पंढरपूर येथे भरणाऱ्या आषाढी एकादशीच्या पार्श्वभूमीवर पंढरपूर शहर आणि शहरापासून पाच किलोमीटरच्या परिसरातील सर्व देशी आणि विदेशी मद्य विक्री दुकाने 11,12 आणि 13 जुलै 2019 रोजी पूर्ण दिवस बंद ठेवण्याचे आदेश जिल्हाधिकारी डॉ. राजेंद्र भोसले यांनी जारी केले आहेत.
त्यांनी आदेशात नमूद केले आहे, की 11, 12 आणि 13 जुलै 2019 रोजी पूर्ण दिवस आणि पंढरपूर शहरातील आणि शहरापासून पाच किलोमीटर त्रिज्या परिसरातील सर्व देशी आणि विदेशी मद्य दुकाने सायंकाळी पाच नंतर बंद ठेवण्यात येतील. त्याचबरोबर श्री. संत ज्ञानेश्वर महाराज आणि श्री. संत तुकाराम महाराज यांच्या पालखीच्या मुक्कामाच्या ठिकाणी ही देशी विदेशी मद्य विक्री दुकान पूर्ण दिवस बंद ठेवली जाणार आहेत.
त्याचा तपशील पुढीलप्रमाणे सहा जुलै 2019 नातेपुते येथे पूर्ण दिवस बंद राहतील. सात जुलै 2019 येथे माळशिरस, अकलूज पूर्ण दिवस बंद राहतील. आठ जुलै 2019 रोजी वेळापूर, बोरगाव, श्रीपूर, माळीनगर, येथील दुकाने बंद राहतील. नऊ जुलै 2019 रोजी भंडीशेगाव, पिराची कुरोली येथील दुकाने बंद राहतील. 10 जुलै 2019 रोजी वाखरी येथील दुकाने बंद ठेवण्याचे आदेशात नमूद केले आहे.
महाराष्ट्र दारुबंदी अधिनियमातील कलम 142 अनुसार मिळालेल्या अधिकारानूसार जिल्हाधिकारी डॉ.राजेंद्र भोसले यांनी हे आदेश जारी केले आहेत. या आदेशाचे उल्लंघन करणाऱ्यांवर कायदेशीर कारवाई केली जाईल, असेही आदेशात नमूद करण्यात आले आहे.
0 Comments