वेस्ट इंडीज संघाला 182 धावांवरच रोखले

पंढरपूर लाईव्ह शुक्रवार दि. 6 मार्च 2015

पर्थ - एकामागून एक गडी लवकर बाद होत गेल्याने वेस्ट इंडीजचा संघ शंभर धावांमध्ये तंबूत परततो की काय असे वाटत असताना होल्डर व इतर फलंदाजांनी दाखविलेल्या थोड्याशा चिवटपणामुळे विंडीजला 44.2 षटकांमध्ये सर्व गड्यांच्या मोबदल्यात किमान 182 धावांपर्यंत मजल मारता आली.

पहिल्या दहा षटकांमध्येच 4 बाद 35 अशी अत्यंत अडखळत सुरवात झालेल्या वेस्ट इंडीजचा डाव गडगडणार हे दिसत होते. कार्टर (66 चेंडूंत 21) आणि डॅरेन सामीने (69 चेंडूंत 26) यांनी मैदानावर टिकून राहत डाव सावरण्याचा प्रयत्न केला, मात्र विशेष यश आले नाही. भारतीय गोलंदाजांचा बिनचूक मारा आणि चांगल्या क्षेत्ररक्षणापुढे त्यांचा जम बसू शकला नाही. तथापि, होल्डरने 79 चेंडूंत 57 धावा केल्याने संघांची एकूण धावसंख्या किमान दीडशतकी मजल मारू शकली.

विश्‍वकरंडक स्पर्धेतील भारत विरुद्ध वेस्ट इंडीज सामन्यात वेस्ट इंडीजने नाणेफेक जिंकून प्रथम फलंदाजी करण्याचा निर्णय घेतला. विजयाची हॅट्रिक केल्यानंतर आज (शुक्रवार) भारतीय संघ वेस्ट इंडीजविरुद्धच्या विजयाचे रंग उधळण्यास सज्ज झाला. दरम्यान वेस्ट इंडीजची धडपडत सुरुवात केली. वेस्ट इंडीजने 25 षटकांत 7 बाद 85 धावा जमविल्या होत्या.

विश्‍वकरंडकात ब गटात भारताचे पारडे जड झाले असून यापूर्वी पाकिस्तान, दक्षिण आफ्रिका आणि संयुक्त अरब आमिरातीविरुद्धचे सामने जिंकून संघाचा आत्मविश्‍वास उंचावला आहे. वेस्ट इंडीजने आतापर्यंत चार सामने खेळले असून त्यापैकी दोन सामन्यात यश मिळविले आहे. त्यामुळे आजचा सामना जिंकून वेस्ट इंडीजलाही ब गटात वर येण्याची संधी आहे. भारतात आज होळीचा सण साजरा असल्याने सार्वजनिक सुटी आहे. त्यामुळे एका बाजूला होळीचा सण साजरा करतानाच भारतीयांना वेस्ट इंडीजविरुद्ध विजयाचा आनंदही साजरा करण्याची संधी मिळण्याची शक्यता आहे.