कुतूहलजनक... भीमा नदीच्या पात्रात सापडली महादेवाची भव्य पुरातन मुर्ती!

 

Pandharpur Live Online: दौंड येथील भीमा नदी पात्रामधील २८ मोऱ्यांच्या रेल्वे पूलानजीक महादेवाचे मुख असलेली जवळपास १५० वर्षांपूर्वीची दगडी मूर्ती खोदकामात सापडली आहे. मूर्तीचे तोंड पाच फुट असून वजन एक टनाच्या आसपास आहे.

............. Adv .............

दौंड-नगर रेल्वे लोहमार्गासाठी गेल्या १५० वर्षांपूर्वी इंग्रजांनी दगडी कामातील पूल उभारला आहे. या पूलाच्या बाजूलाच दुसरा रेल्वे पूलाच्या पायाभरणीचे काम सध्या सुरु आहे. या ठिकाणी शनिवारी खोदकाम सुरू असतांना एका खड्यात ही मूर्ती सापडली. कामागारांनी ही मूर्ती जेसीबीच्या सहाय्याने बाजूला ठेवली आहे.

 ही मूर्ती पाण्याच्या प्रवाहात वाहून आलेली आहे असे मत काहिजणांनी व्यक्त केलंय. मात्र, मूर्तीचे वजन जास्त असल्याने ही मूर्ती वाहून येऊ शकत नाही. ती या ठिकाणची असल्याची माहिती काही तज्ञांनी व्यक्त केली आहे. मूर्तीच्या मुखाचा भाग सापडला असून याच परिसरात इतर अवशेषही सापडण्याची शक्यता आहे.

पुरातन कालीन मूर्ती दौंड परिसरातलीच!

पाण्याचा कितीही मोठा प्रवाह असला तरी १ टन दगडाच्या वजनाची मूर्ती दूरवरुन वाहून येऊ शकत नाही. फार तर इकडे तिकडे जवळ अंतरावर या मूर्तीची हालचाल पाण्याच्या प्रवाहामुळे होऊ शकते. गेल्या दोन वर्षात भीमा नदीला जोरदार पाण्याचा प्रवाह असलेला पूर आलेला नाही. त्यामुळे ही पुरातनकालीन मूर्ती या ठिकाणचीच असण्याची शक्यता आहे.

- रवींद्र जाधव, सेवानिवृत्त पाटबंधारे अभियंता