पंढरपूर लाईव्ह:- सांगोला (जि.सोलापूर) शहर व तालुक्यात सामाजिक क्षेत्रात अग्रेसर असलेल्या शहीद अशोक कामटे सामाजिक संघटनेच्या वतीने सांगोला शहरात साथीचे रोगावर नियंत्रण आणण्यासाठी जनजागृती अभियान सुरु केल्याची माहिती संपर्क प्रमुख निलकंठ शिंदे (सर) यांनी पंढरपूर लाईव्ह ला दिली.
या अभियानामध्ये प्रामुख्याने शहरात हिवताप, डेंग्यू, चिकनगुनीया यासारख्या साथीच्या रोगावर नियंत्रण मिळविण्यासाठी शहरातील नागरिकांना याद्वारे आवाहन करण्यात आले की, घरातील मोरी, नाले, स्वच्छ व साफ ठेवा, घरातील टाक्या व हौद वगैरे आठवड्यातून एकदा स्वच्छ करुन कोरडे करावे आणि नंतर पाणी भरावे. गळती असलेल्या टाक्या, हौद व नळ वेळीच दुरुस्त करून घ्यावेत. त्यामुळे आजुबाजूच्या परिसरात पाणी साचून डासांची निर्मिती होणार नाही. छतावर असलेल्या पाण्याच्या टाक्या झाकून ठेवाव्यात. फुटलेले डबे, टायर आदी मध्ये व छतावर आणि परिसरात घाण पाणी साचू देवू नये. बागेत, घरासमोर अथवा घरातील हौदात गप्पी मासे सोडून द्यावेत. सदर मासे डासांची अंडी खातात. त्यामुळे डासोत्पत्ती थांबते. शक्यतो मच्छरदाणी लावून झोपावे. सर्व पाणीसाठे रिकामे करुन आठवड्यातून एक दिवस कोरडा पाळावा. आदी जनजागृती करण्यात आली.
वातावरणातील विचित्र बदलामुळे रुग्णांचे प्रमाण वाढत आहे तरी शहर व परिसरातील प्रत्येक नागरिकांनी याबाबत जागरुक राहून काळजी घ्यावी असे आवाहन शहीद अशोक कामटे सामाजिक संघटनेच्या सर्व पदाधिकार्यांनी माहितीपत्रके वाटून केले आहे. यावेळी संघटनेचे अध्यक्ष आशिष जाधव व सर्व पदाधिकारी उपस्थित होते.
------------------------------------------------------------------------------------------------------------------------
0 Comments